Universis præsentes litteras inspecturis, Petrus, presbiter et curatus de Buxiaco, æternam in Domino salutem. Universitati vestræ præsentibus litteris significo, quod ob remedium animæ meæ et parentum meorum dono et quitto in perpetuum sanctis apostolis Petro et Paulo et ecclesiæ Cluniacensi, in manso de Molendino, in illa parte quam illi qui dicuntur li Trullaz de me tenent, decem solidos Divionenses, et unum bichetum de frumento, et unum quarterum olei; ita quod sine reclamatione alicujus memorata Cluniacensis ecclesia dictum donum meum futuris temporibus possideat libere et quiete. In cujus rei testimonium dominus Cabilonensis episcopus, ad instantiam meam, præsentibus litteris sigillum suum apposuit. Actum anno Domini M^o CC^o tricesimo secundo, mense maio.